Binuhay liwat an isyu kan Charter Change (Cha-cha) makalihis na akusaran ni Senador Imee Marcos na nasa pressure an Senado.
Sa intrevista kan Bombo Radyo ki Atty. Michael Henry Yusingco (Political Analyst, Senior Research Fellow sa Ateneo Policy Center), sinabi niya na an Cha-cha nahihiling na parte sana kan “political calculation” para sa 2028 na eleksyon.
Kinokonsiderar ining sarong “daan na iskrip” na ginagamit tanganing raoton an imahe kan mga kalaban sa pulitika, orog na ta mayo nin malinaw na aksyon hale sa Malacañang o Kongreso tanganing isulong ini sa presente. An paggamit kan plenaryo kan Senado para sa mga video nin propaganda pigtuyaw man na nahihiling na nakakaraot sa reputasyon kan institusyon.
Idinagdag ni Yusingco na an Presidente kan Senado na si Alan Peter Cayetano nakaresibe nin grabeng kritisismo huli sa saiyang istilo nin liderato na pigladawan bilang “divisive.” An paggamit nin mga “gimik” arog kan mga Pokemon card asin pagkotar nin mga bersikulo sa Bibliya nahihiling na “performative” asin kulang sa sinseridad, sarong bagay na pigkokonsiderar na bakong angay para sa sarong lider kan Senado na piglalaoman na magpapauswag nin pagkasararo.
Mientrastanto, an mga personal na iriwal arog kan “fried chicken incident” sa pag-oltanan ni Senador Robin Padilla asin Senador Kiko Pangilinan, asin an emosyonal na mga simbag ni Senador Pia Cayetano asin Senador Risa Hontiveros, pighihiling na nakakabawas sa kredibilidad kan Senado sa mata kan publiko.
