Nanotaran kan Philippine Coast Guard an mga barko kan Tsina sa Bajo de Masinloc o mas bisto bilang Scarborough Shoal mantang nagpapanao nin fuel subsidy asin mga kakanon sa mga Pilipinong parasira kan Huwebes.
Sa sarong pahayag ni PCG Spokesperson para sa West Philippine Sea Admiral Jay Tarriela, nakita sa lugar an sarong People’s Liberation Army Navy (PLA-N) warship, tolong China Coast Guard vessels, asin tolong Chinese Maritime militia vessels.
Segun pa ki Tarriela, hinamon pa sa paagi kan radyo kan sarong barkong pandigma kan Tsina an eroplano kan Philippine Coast Guard (PCG) na Piper Navajo.
Kun saen nagsimbag man an aircraft na ini nagsasagibo nin sarong legal maritime patrol sa laog kan maritime zones kan Pilipinas, susog sa international law.
Segun pa ki Tarriela, nagsagibo an Philippine Coast Guard nin pagbantay sa kadagatan kan Bajo de Masinloc tanganing magtao nin suporta sa nagpapadagos na Kadiwa ng Bagong Bayaning Mangingisda na pinapangenotan man kan Bureau of Fisheries and Aquatic Resources.
Mantang 35 man na Pilipinong parasira an nakaresibe nin diesel asin mga kakanon hale sa Philippine Coast Guard.
Maroromdoman na kan 2016, nagdesisyon an Permanent Court of Arbitration sa The Hague pabor sa Pilipinas manungod sa mga pag-aako kan Tsina sa South China Sea, asin sinabi kaini na an mga nasabing pag-aako iyo “walang legal na batayan.” Kun saen padagos pa man giraray na dai kinikilala kan Tsina an desisyon.
