NAGA CITY- Pig-enkaminar kan City Veterinary Office-Naga an mga pet owner na pabakunahan an saindang mga ataman na Ido.
Sa entrevista kan Bombo Radyo Naga ki Dr. Marilee P.Lingua, City Veterinary Office, sinaysay kaini na dagos-dagos an saindang pigkukundusir na anti-rabies vaccination sa bilog na siyudad kan Naga tanganing mapababa an kaso kan nairerehistrong nakakagat kan mga hayop na igwang rabies.
Katakod digde, tapos na soboot an saindang pigkundusir na house to house vaccination kun kaya pig-enkimanar na sana man kan opisyal an mga pet owners na magpasiring sa saindang opisina puon Lunes hasta Biyernes alas 8 hasta alas 5 nin hapon.
Apwera digde, maogma na pigheras ni Lingua na kadakol naman na barangay an nakikipag-koordinar sa sainda dapit sa dog catching na saro sa mga programa kan saindang opisina.
Dugang pa kan opisyal, dakulang katabangan sa saindang lado na pigsusuportaran kan mga barangay an mga training na saindang pigpapamayuhan dapit sa pagdadakop nin Ido huli ta nalilikayan an mga problema na pigkakawsa kan mga basay-basay na hayop siring kan mga Ido na nagigin rason sa aksidente asin minsan pagkuriyat nin mga basura.
Sa ngunyan, hagad na sana liwat kaini an pakikipagtabangan kan publiko tanganing magin salbado an komunidad kontra sa rabies.
