NAGA CITY- Nagpagirumdom an City Veterinary Office sa mga pet and livestock owner sa siyudad nin Naga na ilaag na sa salbadog lugar an saindang mga atamang hayop katakod sa pinaglalaoman na pagtama kan Bagyong Pepito.
Sa entrevista kan Bombo Radyo Naga ki Dr. Marilee Lingua, Head kan City Veterinary, sinaysay kaini na kaipuhan i-apply an mga nanudan sa nakalihis na Bagyong Kristine tanganing malikayan an pagkagadan kan kadakol na mga hayop huli sa kalamidad.
Sigun sa opisyal, antes pa an bagyo, ilaag na soboot sa salbadong lugar an mga atamang hayop, tawan nin pagkakan asin tagamahan na nin pagkakan.
Alagad para man sa mga dae malilikayan asin kaipuhan na iiba sa mga evacution center an mga atamang hayop, kaipuhan na makipag-koordinar sa manager kan nasambitan ng evacution center tanganing dae magkaproblema.
Dugang pa ni Lingua, kaipuhan man na igwa ining sadiring pagkakan tanganing dae na makibangaan pa sa mga pagkakan na para sa mga tawo.
Pigsaysay pa kaini na mayo pang nakatalaan na lugar para sa mga hayop tuyong igwang bagyo kun kaya kaipuhan an kanya-kanyang pagsalbar sa saindang mga hayop.
Sa ngunyan, padagos an pagtataong abiso kan City Veterinary Office sa gabos na maging preparado sa Bagyong Pepito.
