Nahihiling kan Department of Energy (DOE) na makakatabang an pagkakaigwa nin Pilipinas nin sadiring strategic petroleum stockpile ta nganing daing urog na maapektaran kan krisis sa Middle East.
Iyan an obheto na ipigheras kan ahensya makalihis kaining kumpirmaron na nagpupuon na an gobyerno nasyonal na magtugdok kan nasambitang pasilidad.
Segun kay Energy Secretary Sharon Garin, nanotaran kaini an nasambitang pangangaipuhan ta nganing urog na masierto an seguridad kan nasyon sa suplay nin enerhiya sa tahaw kan nagpapadagos na kaguluhan sa nasambitang rehiyon sa Asya.
Enkasong matapos na an pasilidad, masirbi ining imbakan kan suplay nin langis sa bilog na Pilipinas kun sain inaantisiparan na mas magiging hababa an barakalan mantang bastante an makukua kan mga industriya na nangangaipuhan nin enerhiya nin dai na naglalaom sa imported oil products.
Mantang apektado kan global oil crisis asin giyera, nahihiling kaya kan ahensya na dai sustenable an mag-asa sana sa imported na langis, partikularmente sa mahalon na kantidad kaini para sa limitadong suplay sana kumpara sa mas dakol na enerhiyang makukua sa mas barato sana hali sa sadiri sanang produce kan nasyon.
Segun man sa ahensya, pwedesir na maglagpas kaysa sa presenteng imbertaryo kan mga pribadong kumpanya an magigin resulta kan planong ini.
Ipigdesignar man an Philippine National Oil Company (PNOC) na itugdok an nasambitang imbakan.
Masiribi man suboot ining solusyon ta nganing dagdagan pa an presenteng suplay nin enerhiya kan nasyon na kaya sanang makonsumo an bilog na pangangaipuhan sa laog sana nin 30 hasta 60 aldaw.
Marurumduman na enot nang ipig-anunsiyar na hasta bulan nin Hunyo 2026 na lang sana ang kakayanon na itao kan presenteng oil supply nin Pilipinas.
