NAGA CITY- Nagtitinir na matuninong an enot na aldaw kan COC Filing sa banwaan nin Goa-Camarines Sur ngunyan na Oktubre 1, 2024.
Sa entrevista kan Bombo Radyo Naga ki Dionisio Miguel, Comelec Election Officer kan Goa CamSur, sinaysay kaini na igwang pig-assign na duwang personahe gikan sa PNP na nasa luwas kan bisinidad kan munisipyo.
An nasambitan ng kasuguan an gikan sa Provincial Government kun saen kada opisina kan Commission on Elections igwang nagbabantay na otoridad.
Sa ibong na lado, liwat man na pig-enkaminar kan opisyal an mga aspirante na amay na mag-file kan saindang COC tangani man na amay nache-check an saindang dokumentos.
Katakod digde, igwa naman nagsumiter kan saindang Certificate of Candidacy alagad dae pa man dagsa an mga tawo o aspirante para sa saindang pagsusumiter kan nasambitan ng COC.
Sa ngunyan, piglinaw man ni Miguel na pwedeng magsubstitute o mag withdraw an siisay man na nagfile kan saindang COC hasta sa Oktubre 8 alagad kaipuhan na susog pa man giraray ini sa piglatag na guidelines kan Commission on Elections.
