Pig-enkaminar kan mga Senador an Commission on Elections (COMELEC) na ipautob tolos an kinakaipuhan na lakdang tanganing madiskwalipika sa pagkandidato sa 2025 elections sa arinman na posisyon sa gobierno si dismissed Mayor Alice Guo.
Sigun ki Senator Sherwin Gatchalian, an naireport na plano ni Guo Hua Ping o Alice Guo na magdalagan sa public office an sarong mapangahas na pagpurbar tanganing maliiton an ley kan nasyon.
Pigtawan duon pa ni Gatchalian na inaprubahan kan COMELEC an rekomendasyon kan saindang law department na aksyunan an pagbalgar ni Guo sa Omnibus Election Code kawsa kan misrepresentation o paghahambog partikularmente na sa pagkakabistuhan asin nationality kaini.
Pigsaysay pa kan Senador na malinaw sa ley kan nasyon na bawal magdalagan sa anuman na posisyon sa gobierno an sarong dayuhan.
Mientrastanto, pigsaysay man ni Senator Risa Hontiveros na posibleng madugangan nin kasong perjury an krimeng kinakahampang ni Guo oras na magsunad ini kan saiyang Certificate of Candidacy (COC).
Pigpunto pa ni Hontiveros, an pagsusunad kan COC an sarong pinanumpaang dokumento asin saro na naman ining paghambog kun sisimbagon ni Guo an saiyang COC asin idedeklarar an sadiri komo sarong Pilipino.
