NAGA CITY – Pigheras kan sarong abogado an mga grounds tanganing mapatotoohan an concubinage asin adultery.
Sa entrevista kan Bombo Radyo Naga ki Atty. Clarence Joseph Ronquillo, legal council kan sarong law office sinaysay kaini na masasabi na nag commit an sarong lalaki nin concubinage enkaso pigbahay kaini an saiyang kabit sa conjugal house ninda kan saiyang agom, panduwa an pagtatalik under scandalous circumstances, asin pagbabahay nin kabit sa ibang lugar.
Dugang pa ni Ronquillo na dipisil na patotoohan an Concubinage huli ta an mga an mga nasambitan ng elemento an patagong piggigibo.
Alagad pupwede man na patunayan an kaso sa paagi naman kan Anti-Violence Against Women and Their Children Act of 2004 o VAWC orog na kun baku man na kasal an magpartner.
An adultery man an pakikipagtalik kan sarong babae sa sarong lalaki na baku man kaining agom. Mas madali man soboot na patotoohan an adultery kumparar sa concubinage.
Ini nin huli ta an kaipuhan sana digdi an mapatotoohan na nakipagtalik an sarong babae sa baku kaining agom asin pupwede na ining kasuhan alagad an sarong lalaki na nakikipaghilingan sana sa saiyang kabit tanganing makipagtalik sa sarong hotel an dae pa man maiikonsiderar na concubinage huli ta kaipuhan na mapatotoohan na nag-iibahan sinda na garu mag-agom sa laog kan sarong harong.
