Ibinasura kan Taguig City Prosecutor’s Office an reklamong perjury na isinangat ni Bise Presidente Sara Duterte laban sa sinasabing dating aide kaini na si Ramil Madriaga.
Segun sa 19-pahinang resolusyon, nahiling kan mga piskal na kulang an ebidensya sa reklamong isinangat kan Bise Presidente.
Dugang pa kan Taguig Prosecutor’s Office, bakong supisyente an mga iprinesentar na ebidensya kan nagrereklamo, kun sain dai napatunayan na nagputik si Madriaga sa saiyang sinumpaang salaysay, na sarong pagbalgar sa Article 183 kan Revised Penal Code.
Kan bulan nin Marso, nagsangat si Duterte nin reklamong perjury sa Taguig City Prosecutor’s Office laban ki Madriaga.
An nasambit na reklamo sarong pagkontra sa isinumitir na reklamo ni Madriaga sa Office of the Ombudsman na nag-deliver ini nin dakulang kantidad nin kwarta sa manlaen-laen na tawo sa pagboot kan Bise Presidente.
