Binawi na kan House quad-committee (quad-comm) an contempt asin detention orders na pigsunad kontra ki dating Presidential Spokesperson Harry Roque, agom kaining si Mylah asin dating Presidential adviser Michael Yang.
Kan nakalihis na banggi kaya nin Lunes, Hunyo 9, opisyal na tinapos kan special joint panel an 11 bulan na imbestigasyon in aid of legislation.
Kaibahan na man na hinali an contempt asin detention order kontra kina Police Colonel Hector Grijaldo asin Senior Police Officer 4 (SPO4) Arthur Narsolis.
Tanganing ipangapodan ni Abang Lingkod Party-list Rep. Joseph Stephen Paduano sa sa apat na co-chairman kan quad-comm dapat halion na an contempt asin detention order ki Roque asin iba pa.
Sinang-ayunan asin inaprobaran man ini ni quad-comm overall chairman, Surigao Del Norte 2nd District Rep. Robert Ace Barbers.
Nagpuon an pagbilog kan quad-comm tanganing pagkonektaron an mga Philippine Offshore Gaming Operator (POGO), extrajudicial killings (EJKs), money-laundering, illegal drugs, asin an madugong paglaban sa droga ni dating Presidente Rodrigo Duterte.
Duwang beses na na-contempt kan quad comm si Roque na an enot iyo an pag-utik na igwang kinaaraman ki Cassandra Ong, sarong POGO representative asin an bigo kaining pagtatao nin mga dokumentos na igwang kinaaraman sa POGO operations sa Pampanga.
Puon kan nakalihis na taon, naghali na sa nasyon si Roque asin naghagad nin asylum sa the Netherlands.
