Ipina-cite in contempt kan Senate Blue Ribbon Committee an contractor na si Pacifico “Curlee” Discaya mantang iisyuhan man nin show cause order an agom kaining ni Sarah Discaya makalihis na dae mag atubang ngunyan sa pagdangog dapit sa mga maanomalyang flood control projects.
Sa pagpapadagos kan pagdangog mapadapit sa mga maanomalyang flood control projects, sinaysay ni Curlee Discaya, agom ni Sarah, na dae makaka atendir an saiyang agom sa imbestigasyon huli sa pigsasapong heart condition.
Alagad kan basahon ni Senate Blue Ribbon Committee Chairman Panfilo Lacson an surat na ipinadara ni Sarah sa komite, nagluluwas na dae ini makaatendir sa pagdangog huli sa meeting kan saiyang kumpanya ngunyan na aldaw asin ikinatwiran pa na gikan pa sa hararayo asin manlaen-laeng lugar an saiyang mga empleyado kaya dae kaini makakanselae.
Huli digde, sinita ninda Senator Kiko Pangilinan asin Erwin Tulfo na dae nagsasabing tototo si Curlee huli ta iba an sinasabi kaini sa nakabugtak sa surat kan saiyang agom kun tano dae makakaatendir sa pagdangog.
Ipinunto man ni Senator Jinggoy Estrada na bakong kaako-ako an excuse letter ni Sarah huli ta national interest an nakataya digde kaya man dae bababuyon asin lolokohin an pagdangog kan Senado.
Siringman, sa ibong kan paghagad nin pasensya ni Curlee Discaya na mayo injng intensyon na maghambog, dae ini umubra sa mga myembro kan komite asin dagusan ining ipina-cite in contempt huli sa paghahambog.
Mientrastanto, nagdesisyon man an komite na paisyuhan muna kan show cause order si Sarah Discaya komo pagsunod sa due process asin digde pagpapaliwanagon kun tano dae ini dapat i-contempt kan Blue Ribbon Committee.
