Nagpatanid an Department of Agriculture (DA) na posibleng bumagsak nin 20% sundo 50% an produksyon nin paroy sa nasyon kun dae matatawan nin aksyon an gobyerno.
Ini huli man sa paglangkaw kan presyo kan abono na ginagamit kan mga paraoma sa saindang mga pananom huli kan kariribokan sa Middle East.
Segun sa Agriculture Usec. Asis Perez, posibleng maapektaran an mga pananom na itatanom sa bulan nin Mayo asin Hunyo, na nangangaipo nin supisyenteng rekursos para sa mga nasambit na bulan.
Kun dae makukuang solusyon, siguradong makakaapektar an pagbaba kan produksyon nin paroy sa metriko tonelada nin suplay nin paroy sa bulan nin Agosto asin Setyembre.
Dae man pigrerekomendar kan DA an pag-importar nin bagas huli ta gabos na nasyon sa bilog na kinaban apektado kan kariribokan sa Middle East.
Sinabi ni Senador Bam Aquino na mayo nang ibang magigibo an nasyon kundi maghanap nin paagi kun paano maatubang an naglalangkaw na presyo kan abono asin petrolyo ngani na mamantenir an produksyon nin paroy sa 78% o labi pa sa nasyon.
