NAGA CITY- Piglinaw kan Department of Agriculture an karasonan sa paglangkaw kan presyo nin kamatis asin iba pang mga produktong pang-agrikultura sa Bicol Region.
Sa entrevista kan Bombo Radyo Naga ki Lovella Guarin, tagapagtaram kan DA-Bicol, sinaysay kaini na sa kabilogan, bastante an supply kan departamento pag-abot sa bagas, manok asin karne kun saen dae man marhay naghiro an presyohan kaini, apwera na sana sa paglangkaw nin maray kan presyo sa kamatis asin pirang gulay huli naman sa mga nakalihis na bagyo.
Sigun ki Guarin, kadakol man soboot nin paagi tanganing marebayan muna an mga nagkukunsumo kan mga nagmahal nin gulay siringman, pwede man soboot magluto na mayo nin kamatis. Dugang pa kan opisyal, kadaklan man sa mga Bikolano an igwa nin backyard garden na saindang pinagkukuanan kan siring na produkto.
An nasambitan ng paglangkaw sa presyohan an dae man soboot makakaapektar nin marhay sa pamumuhay kan mga Bikolano.
Mientrastano, sa sainda man na January 9 Bantay Presyo, sa karne nasa P320 an kada kilo sa Legazpi mantang sa Naga City an nasa P340.
Sa ibong na lado, nacontaine naman kan saindang lado an kaso kan ASF sa rehiyon kumparar kaidto. Apwera pa digdi, nagtitinir na sana an siring na helang sa orig sa Albay, Sorsogon, Masbate asin Camarines Sur. Kun saen, sa probinsya kan Camarines Sur an naghahalat na sana nin 90 aldaw antes maideklarar na ASF free.
