Nagpromisa an Department of Agriculture (DA) na magdodoble-kayod pa ini tangani mamantinir an dagos-dagos na pagbaba asin pagluya nin inflation sa nasyon.
Enot na nairehistro kan Philippine Statistics Authority (PSA) na nagluya sa 0.9% an inflation sa nasyon kan nakalihis na bulan nin Hulyo.
Nagluluwas sa report kan PSA na an pagluya kan presyo nin pagkakan iyo an mayor na rason kaini, orog na an haros 16% na ibinaba kan presyo nin mga produktong mais asin bagas.
Hurot ni Agriculture Secretary Francisco Tiu Laurel Jr., sunod na aatubangon kan ahensiya an dagusang pagpapababa sa presyo nin bagas asin urig asin gibuhong barato an duwang commodities tangani mamantinir an marahay na dalagan kan inflation.
Nagpromisa an sekretaryo na nakahanay na an nagkapira pang programa para sa duwang produkto kun saen sa hog industry, pinaplano na kan gobyerno na gibuhong available an ASF vaccine antes na matapos an taon.
Pag-aadalan man an nagkapirang panundon na sinusunod sa pag-aangkat nin karne kan urig.
Sa bagas, target kan DA na mapababa pa an presyo gikan sa dating ipinataw na maximum suggested retail price para sa 5% broken imported rice gikan sa dating P45 pasiring P43 kada kilo.
