Nagpakol na sa P6.16 bilyon an kabuuang danyos sa imprastraktura, mantang nag-abot naman sa P2.32 bilyon an nawarang kantidad sa sektor kan agrikultura huli sa padagos na epekto kan Southwest Monsoon o Hanging Habagat, base sa Office of Civil Defense o OCD.
Sigon sa report kan OCD Disaster Preparedness Service, haros 724 lugar na sa bilog na nasyon an direktang naapektuhan kan maraot na panahon, makusog na pag-uran asin mahewasan na pagbaha.
Sa ngonian, padagos an ginigibong beripikasyon kan mga awtoridad sa mga naraot na mga tinampo, tulay asin iba pang pampublikong pasilidad, pati na man sa mga naraot na mga pananom asin mga oma.
Pigsierto kan OCD na nakatutok an saindang opisina sa padagos na pakikipag-ugnayan sa mga lokal na gobyerno asin iba pang ahensya kan gobyerno tanganing padagos na maipaabot an kinakaipuhan na tabang sa mga komunidad na naapektuhan.
Mientrastanto, liwat na nagpagirumdom an mga awtoridad sa mga residente na nagtitir sa mga hababang lugar asin flood-prone areas na magin alerto pirmi asin magsunod sa mga abiso kan lokal na gobyerno asin mga disaster response team.
