Nag-abot na sa labi sa P5.5 bilyon an total na gastos kan danyos sa sektor kan agrikultura sa manlaen-laen na parte kan nasyon huli sa padagos na epekto kan grabeng El Niño.
Base sa pinakabagong datus hale sa National Disaster Risk Reduction and Management Council (NDRRMC), maabot sa 201,322 na mga paraoma asin parasira an direktang apektado asin nawaran nin mayor na kabuhayan huli kan tigmara.
An Rehiyon 2 (Cagayan Valley) an pinakagrabeng tinamaan kan grabeng tigmara, sinundan kan mga rehiyon kan CALABARZON, Region 5 (Bicol), Region 9 (Zamboanga Peninsula), Region 11 (Davao Region), Region 12 (SOCCSKSARGEN), asin CARAGA.
Padagos an pagtao nin tabang kan manlaen-laen na ahensya kan gobyerno asin lokal na gobyerno nganing makapanao nin ayuda asin alternatibong kabuhayan sa mga pamilyang grabeng apektado kan kalamidad.
Piglalaoman man an mas mahigot na pagmonitor sa mga lugar na padagos na nakakaeksperyensya nin kakulangan nin tubig tanganing maibitaran an mas dakulang pagkalugi sa mga maabot na ani.
