Kinumpirmar ni Department of Budget and Management (DBM) Secretary Amenah Pangandaman na kinanselar na kan Procurement Service kan DBM (PS-DBM) an membership sa Philippine Government Electronic Procurement System kan 9 na kompaniyang konektado ki Sarah Discaya. Buot sabihon, pagbabawalan na an mga ini na makisumaro sa government procurement sa fururo.
Sa sarong statement ngunyan na Lunes, Setyembre 8, sinaysay ni Budget Secretary Amenah Pangandaman na pigbibisto kan PS-DBM an responsibilidad kaini na tumabang sa ibang sangay kan gobyerno asin kawani sa pagsierto na mayong korupsiyon orog na sa public procurement.
Pigtawan duon man kan sekretaryo na an PH government electronic procurement system an pangenot na pinagkukuanan nin government procurement information asin main channel para sa gabos nin aktibidad kan gobyerno para sa procurement.
Nagtitinir man na naka-high alert an PS-DBM sa pagkanselar sa memberships kan SYMS Construction Trading asin man Wawao Builders sa oras na mag-isyu na an Department of Public Works and Highways (DPWH) nin official blacklisting order.
Ginibo an nasambitan ng lakdang kasunod man kan direktiba ni Presidente Ferdinand Marcos Jr. tangani ma-blacklist an mga kontraktor na imbwelto sa katiwalian sa flood control projects na makakaapektar sa mas kadakol pang mga kompaniya.
