Dating Senador Leila de Lima, sa saiyang post sa X, grabeng binatikos si Bise Presidente Sara Duterte huli sa saiyang pagkaparong sa agresibong aksyon kan China kontra sa mga mangingisdang Pilipino asin sa pag-angkin kaini sa mga teritoryo kan Pilipinas.
Nagpahayag man si De Lima nin paghadit manungod sa sarong kompanyang konektado sa Bise Presidente asin sa saiyang agom na nagresibe nin P319 milyon hale sa nagkapirang state-owned enterprises kan China.
Binanggit man kan dating senador an haros P1 bilyong dae maipaliwanag na yaman na iniuugnay ki Duterte.
An mga akusasyon ni De Lima nagluwas sa tahaw kan padagos na tensyon sa West Philippine Sea asin an panawagan para sa mas matibay na tindog kan gobyerno kontra sa China.
Bilang simbag, sa sarong pulong balitaan kan Office of the Vice President para sa saindang anniversary kickoff, kinuestyon ni Duterte kun an pakikipagnegosyo sa China dapat ibilang na peligro sa pambansang seguridad.
Nagpatanid pa siya na an Pilipinas nanganganib na magin “troublemaker of Southeast Asia” kun padagos na magpapalala nin tensyon.
