Nagsakat na sa 546 an nairehistrong nagadan huli sa dengue ngunyan na 2024 base sa datos gikan sa Department of Health (DOH).
Ini an katampad kan case fatality rate na 0.26%, mas hababa kun ikukumparar sa 0.39% kna nakalihis na taon.
Sigun ki Health Secretary Ted Herbosa, an mas hababang numero kan binawian nin buhay huli sa dengue an posibleng huli sa pinatibay na pangangasiwa sa mga kaso sa mga ospital.
Mientrastanto, puon kan Enero 1 hasta Setyembre 6, nasa kabilogang 208,965 an nairehistrong kaso kan dengue, mas halangkaw ini nin 68% kumparar sa parehong period kan nakalihis na taon na nasa 124,157 cases.
Nanutaran man nin padagos na uptrend kan dengue cases ngunyan na rainy season kun saen kan premirong duwang semana kan Agosto, naglangkaw an mga kaso sa gabos nin rehiyon apwera sa Mimaropa, Bicol Region, Zamboanga Peninsula, asin Bangsamoro.
Padagos man na nagpapagirumdon an DOH sa publiko na sunudon an 4S strategy kontra sa dengue kabali na an search o paghahanap asin pagraot sa pinaggigikan kan lamok, Secure self-protection, Seek early consultation asin support fogging o spraying sa hot spot areas orog na ngunyan na panahon kan tag-uran.
