Nangapudan nin paglilinaw si Negros Oriental 3rd District Rep. Janice Degamo sa mga bareta na nagbisita suboot si Bise Presidente Sara Duterte ki dating kongresista na si Arnolfo “Arnie” Teves Jr., na pig-aakusaran na nag-mastermind sa paggadan sa saiyang nagadan nang agom na si dating Gov. Roel Degamo.
Segun sa mga report, nangyari daa an pagbisita sa Camp Bagong Diwa sa Taguig City kan huring parte kan 2025, alagad dae pa ini pigkukumpirma o pignegaran kan Bise Presidente.
Sa hearing kan House Committee on Justice dapit sa impeachment complaints laban ki VP Sara Duterte, tinawan nin duon ni Degamo an pangangaipo nin malinaw na paliwanag gikan sa Bise Presidente, urog na lakop an mga alegasyon na posibleng may relasyon an saiyang pagbisita sa pagprobar na pang-atake ki Ramil Madriaga, sarong testigo sa impeachment proceings na detenido man sa parehong pasilidad.
Sigon ki Degamo, importante an katotoohan asin accountability urog na sa mga pamilya kan mga biktima nin political violence.
Mientrastanto, sinabi ni National Bureau of Investigation (NBI) Director Melvin Matibag sa hearing na base sa saindang imbestigasyon, duwang beses suboot nagbisita si VP Sara sa Camp Bagong Diwa. Enot siyang nagprobar na magbisita ki Madriaga, alagad nagsayuma suboot na magpahiling si Madriaga.
Kinumpirmar man kan NBI na nakaresibe sinda nin informasyon dapit sa suboot pagprobar na pang-atake ki Madriaga sa laog kan karsel, na padagos pa nindang pig-iimbestigaran.
Bukas man an Bombo Radyo para sa kampo ni VP Sara Duterte.
