Naglansar an Department of Environment and Natural Resources (DENR) nin sarong nationwide ecosystem restoration program, na nakasentro sa pag-areglo kan mga salog, estero, asin iba pang daluyan nin tubig, bilang pagpreparar sa nagdadangadang na peligro kan Super El Niño sa nasyon.
Segun sa pamayo kan ahensya, an saindang katuyuhan iyo na seguraduhon na an mga salog asin manlaen-laen na wetlands sa nasyon magdanay na nagagamit asin may marhay na agos.
Ini man sarong paagi tanganing maprotektahan an mga komunidad na nakapalibot sa mga ini.
Nagsagibo an DENR Manila Bay Site Coordinating and Management Office nin paglinig sa mga salog asin mga aktibidad sa pagmantener kan daluyan nin tubig sa irarom kan Manila Bay Rehabilitation Initiative.
Sa Pampanga, nag-deploy man nin mga River Rangers para sa sarong 10-day cleanup operation sa mga salog, creek, asin mga estero.
Nakaabot na sa 98,618.93 kilo an mga basura na nakua hale sa mga nalinig na estero, salog, asin creek, na katumbas kan 15,267 na sako nin basura.
Padagos man an pagmonitor kan DENR, Manila Bay Site Coordinating and Management Office sa mga water supply sources sa Bulacan, Pampanga, Nueva Ecija, Bataan, asin Tarlac.
Padagos man an pagmonitor kan DENR Region 3 sa magigin marine heat stress sa mga coastal areas kan Aurora, Bataan, asin Zambales tanganing maaraman an magigin kondisyon kan mga maapektuhang marine ecosystem asin matabangan man an mga pangisdaan hale sa elevated sea temperatures.
