Naaprubaran na kan Philippine Health Insurance Corporation (PhilHealth) Board an premirong preventive oral health care benefit package kan nasyon.
Maogmang ibinarita ni Health Sec. Teodoro Herbosa na laog naman sa bagong health benefits package an pangangataman sa ngipon. An pag-aprubar an kasabay kan pagbali kan nasyon sa kaenot-inuting World Health Organization Global Oral Health Meeting sa Bangkok, Thailand.
Sa irarom kaini, sagot kan state health insurer an kantidad na P1,000 oral health benefit kada taon para sa preventive oral care services kan mga miyembro.
P300 para sa premirong bisita, sakop an mouth examination/oral screening, oral prophylaxis (cleaning), asin fluoride varnish application.
P300 para sa panduwang dalaw nin dae mababa sa apat na bulan pagkatapos kan enot na dalaw, para sa parehong serbisyo. P200 man an kada ngipon (maximum na duwang ngipon kada taon) para sa pit and fissure sealant asin Class V procedure.
Dae kaiba sa benefit package an bunot, sigun ki Department of Health (DOH) Asec. Albert Domingo.
Magagamit an benepisyong ini sa primary care facilities siring kan Bagong Urgent Care and Ambulatory Service (BUCAS), centers asin rural health units.
Sigun ki Domingo, binabalangkas pa sa ngunyan an circular katakod kan oral health care benefit package, kabilang ang payment mechanism, na planong mailabas ngayong Disyembre. Target na PhilHealth ipautob an nasambitan ng dental services sa premirong quarter kan 2025.
