NAGA CITY- Pinagirumduman kan sarong opisyal kan DepEd-CamSur an mga paratukdo na dae dapat pagsayangon an saindang lisensiya sa mga bagay na mayo man nin importansiya.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd-CamSur, sinaysay kaini na kada tolong taon an mga paratukdo an kaipuhan na mag-renew kan saindang lisensiya na kun saen dapat na magsairarom sa Continues professional development program.
Sigun ki Pelingon, an mga paratukdo an kaipuhan na magpadagos sa pag-aadal, magsairarom sa training, seminars asin workshop tanganing makapagtao man nin marhay na klase kan edukasyon sa saindang mga kaakian.
Dugang pa kan opisyal, ini an komo parte kan sinumpaan na tungkulin kan mga paratukdo na pakarhayon asin buhayon an kalidad kan edukasyon sa nasyon.
Huli kaini, liwat na nagpagirumdom si Pelingon sa gabos na mga paratukdo na likayan na maibwelto sa mga salang gibuhon nin huli ta pwede soboot na masakripisyo an saindang lisensiya sa mga bagay na dae man importante.
Sa ngunyan, hagad na sana kaini na magtinir na professional an mga paratukdo nin huli ta nagseserbe an mga ining panalmingan kan mga estudyante asin mga jovenes para sa marhay na futuro.
