Nagpahayag nin pagkontra an defense counsel na si Atty. Justin Nicol Gular matapos ipahayag kan private prosecutor na si Atty. Erwin Matib na “laging nananalo” si Vice President Sara Duterte bilang director kan sarong partikular na kompanya.
Nagpuon an tensyon kan haputon ni Matib an saksi na si Gerardo Del Rosario hale sa Securities and Exchange Commission (SEC) manungod sa proseso kan pagpili kan mga miyembro kan board of directors.
Sinimbag kan saksi na an mga director pormal na ineelehir kan mga shareholder sa paagi nin sarong eleksyon.
Kasunod kan pahayag kan saksi, sinabi ni Matib na garo taon-taon an ginigibong eleksyon asin “laging nananalo” si Duterte bilang director sa nasabing korporasyon, sarong pahayag na tulos na kinontra kan depensa.
Punto ni Atty. Gular, dapat na naghahale mismo sa saksi an mga ebidensya asin bako sa sadiring konklusyon o opinion na ginigibo kan prosecutor mantang naghahapot.
Huli kaini, pormal na hinagad kan defense team na i-strike sa opisyal na rekord an mga ginibong konklusyon ni Matib manungod sa mga katotoohan asin ley, na ipinahiling na pwedeng ibilang sana na mga talumpati o pahayag na mayong pormal na basehan hale sa saksi.
