NAGA CITY-Nagpatanid si House Deputy Majority Leader asin dating health secretary Janette Garin sa publiko laban sa paggamit nin vape huli ta posible soboot magkawsa nin kagadanan an haloy na paggamit kaini.
Pig-gibo ni Garin an patara-tara makalihis an bareta kan Department of Health(DOH) sa pagkagadan kan 22 anyos na lalaki na may koneksyon sa pagve-vape.
Sigun sa DOH naggadan an 22-anyos huli sa atake sa puso kasunod kan labing danyos sa baga.
Duwang taon nang nag-gagamit nin vape an lalaki.
Pigpunto kan Iloilo First District Representative na dai alternatibo an vaping sa paninigarilyo asin dai ini mas salbadong gamiton, kun saen pigdugang kaini na an mga naggagamit nin vape posibleng magkaigwa nin medical condition na e-cigarette or vaping product use associated lung injury o EVALI.
An EVALI sarong seryosong medical condition kun saen an baga kan sarong tawo labing nadadanyaran huli sa mga ingredients na yaon sa mga e-cigarette o vape products sigun sa Yale Medicine.
Mientrastanto pigheras kan Global Youth Tobacco Survey na poco mas o menos saro sa kada pitong kahubinan na may edad 13 hasta 15 an naggagamit nin vape.
