Pinagiromdoman kan Department of Health an publiko na maglikay ngunyan na panahon kan amihan orog na sa mga helang na kalimitang naeeksperyensiyahan sa mga siring na panahon.
An Amihan an nagdadara nin malipot asin marang duros na karaniwang naeeksperyensiyahan puon bulan nin Nobyembre hasta Marso, kaya man importante importanteng magin preparado asin protektado.
Pira sa mga helang na madalas na nagigin problema sa panahon kan Amihan iyo an trangkaso, na bistado man komo influenza; an sipon, na kadalasang igwang kaibahan na abo asin bahing; an pulmonya, sarong impeksiyon sa baga na pwedeng magdara nin sakit sa paghangos; an allergic rhinitis, na nagigin rason paggatol kan dungi asin pagbahing huli sa mga allergens; asin an pagigiin dry kan kublit, na pwede mang magresulta sa eksema, sarong kondisyon kun saen nagakakaigwa nin paggatol asin paggatok kan kublit.
Tanganing malikayan an paglakop kan mga helamg na ini, nagtao an DOH nin nagkapirang importanteng pagiromdom asin rekomendasyon.
Kaibahan digde an regular na paghuhugas kan kamot gamit an sabon asin tubig, orog na antes magkakan asin pagkatapos maggamit nin banyo.
Kun nakakaeksperyensiya nin sintomas kan helang, inabisuhan an pagtinir sa harong tanganing dae makahawa sa iba.
Importante man an pagsusulot nin face mask kun maluwas nin harong, orog na sa mga matawong lugar tanganing maprotehiran an sadiri asin an iba.
