Target kan Department of Health (DOH) an pagpapabakuna nin Human Papillomavirus (HPV) sa haros sarong milliong Grade 4 na estudyante gikan sa mga pampublikong eskwelahan, pati na man an iba pang mga estudyante gikan sa mga pribadong eskwelahan sa nasyon.
Sa nagin pahayag ki Department of Health (DOH) Secretary Teodoro Herbosa pigsaysay kaining plano kan saindang ahensya na magpuon nin rollout kan bakuna sa pakikipagtabangan kaini sa Department of Education (DepEd) sa ikaduwang kwarter kan 2025.
Dugang pa ni Herbosa na magpuon kan Enero 6, labi sa kabangang milyong estudyante na gikan sa Grade 4 an nakaresiber na soboot nin enot na doses kan Human Papillomavirus vaccine sa paagi kan saindang school-based immunization program.
Mantang sa tala kan International Agency for Research on Cancer kan World Health Organization (WHO) maabot na sa 8,549 na mga babaeng Filipino an apektado kan cervical cancer asin man kabanga sa mga binawian nin buhay kan 2022.
Dugang pa kaini 95% kan mga kaso kan cervical cancer an nagpupuon sa HPV, sarong klase kan sexually transmitted infection na kawsa kan skin-to-skin contact o pakikipag sexual intercourse.
Tanganing mabawasan an mga perwisyo na dara kan virus, pig suhestyon kan DOH na mabakunahan an mga aking babae magpuon sa edad na siyam na anyos.
