Ipinahayag ni Justice Secretary Fredderick Vida kan Biyernes na nakahanda na an saiyang departamento na magsumite sa sarong lokal na korte nin petisyon para sa extradition ni Apollo Quiboloy, an sinasabing sexual offender asin kagtugdas nin sarong relihiyosong sekta, pasiring sa Estados Unidos.
Segun ki Vida, nasa pinal na tangga na an ahensya kan pagpreparar para sa pagsumite kan petisyon, apwera sa nagkapirang “legal scrubbing.”
Sinabi kan DOJ kaipuhan munang maingat na repasuhon kan departamento an mga dokumento bago ini pinalisaron asin iandam para sa pagsumite sa korte.
Ipinaliwanag kan pamayo kan DOJ na gusto sana ninda seguraduhon na an petisyon magigin uyon sa 1994 extradition treaty kan Pilipinas sa Estados Unidos, siring man sa pinakabagong desisyon kan Korte Suprema na nagmamawot na pasimplehon an mga proseso nin extradition kun ini makaabot na sa mga korte.
Base sa bagong mga regulasyon kan Korte Suprema, an mga apela pwedeng iangat sana sagkod sa lebel kan Court of Appeals, na igwa sana nin 90 aldaw para makapagluwas nin desisyon bago ini ibilang na pinal asin tulos na ipapatupad.
Si Quiboloy, na ngunyan nakadetenir sa Pasig City jail huli sa sinasabing qualified human trafficking asin child abuse and exploitation, hinahanap kan sarong korte sa California huli sa akusasyon na nagplano na makikabtang sa sex trafficking sa paagi nin pwersa, panloloko, pamimirit, asin sex trafficking nin mga aki.
Nag-aatubang man siya nin suway na kaso nin sexual abuse asin maltreatment sa sarong trial court sa Quezon City.
Liwat na idinugang ni Vida na an petisyon para sa extradition ni Quiboloy isusumite sa sarong lokal na korte.
An sarong extradition pwedeng ipagpaliban tanganing tugutan an pagpapadagos kan kriminal na prosekusyon kan extraditee o an pagserbi nin sentensya sa nasyon para sa sarong sala na laen sa kun ano an hinahagad na extradition.
Minsan siring, sinabi kan departamento nin hustisya na an temporaryong pagsuko kan extraditee pwedeng tugutan, alagad pagkatapos sana na magsumite nin mosyon sa korte kun sain nakapending an kasong kriminal.
Nagpahayag na an DOJ nin kumpiyansa na aaprubaran kan lokal na korte an petisyon.
