Naghagad nin despensa an Department of Public Works and Highways (DPWH) huli sa kulang na datos na enot kaining isinumiter sa Senate Committee on Finance katakod kan paggamit kan revised Construction Materials Price Data (CMPD).
An CMPD iyo an updated na basehan sa pagtantiya kan gastos kan mga materyales sa mga proyekto kan gobyerno.
Sigun sa DPWH, inamin nindang nagkulang sinda huli ta an Regional Adjustment Factors sana an saindang naitao, na dae bastante tangani na matukoy kan Senado an eksaktong adjustments para sa haros 10,000 proyektong maaapektaran.
Nasuspinder an meeting kan bicameral conference committee kan nakalihis na Lunes huli sa dae pagkakasundo sa P45-bilyong bawas sa badyet kan DPWH.
Pighurot kan mga senador an budget cut, mantang sinaysay man kan mga miyembro kan Kamara asin ni Public Works Secretary Vince Dizon na pwedeng dae maipautob o mauktaba an poco mas o menos 10,000 proyekto huli sa bawas na pondo.
Komo simbag, sinaysay kan DPWH na nagsumiter na sinda nin dugang datos basado sa klase kan proyekto, na isinasaalang-alang an importanteng salik siring rayo kan biyahe kan mga materyales asin lokal na hiro kan merkado.
Obheto kaini na magtao nin mas makatotohanan asin mas pakarhay na basehan kan pondo. Pigsierto kan DPWH na nagtitinir sindang bukas asin tapat sa proseso asin hihinguhahong masierto na an gabos kan pagbabago an may teknikal na katumpakan asin praktikal na kakayahang ipautob.
