Lininaw kan Department of Social Welfare and Development (DSWD) na nasa P797.80 sana an aktuwal na gastos kan kada prepacked Family Food Pack (FFP), kontra sa impormasyon na naglilibot online na an presyo kan kada food pack suboot labi sa P1,500.
Segun ki DSWD Secretary Rex Gatchalian, an kantidad na P1,503.84 na nahihiling sa nagkapirang post sa social media nanonongod sa Approved Budget for the Contract (ABC) o maximum na itinalaan para sa procurement asin bako an aktuwal na kantidad na ibinabayad kan gobyerno.
Sa sarong entrevista, inapod ni Gatchalian na “fake news” an alegasyon na an kada Family Food Pack nagkakantidad nin P1,503.
Ipinaliwanag kan sekretarya na an ABC nagseserbing kisame o maximum na kantidad na pwedeng itagama para sa sarong procurement. Mientrastanto, P797.87 an aktuwal na kantidad na pinagkasunduan kan supplier kada food pack.
Tinawan duon man ni Gatchalian na ginigibo an procurement kan DSWD sa paagi nin competitive bidding. An kontrata itinatao sa supplier na nagsusumite kan pinakahababang responsive bid—o an pinakahababang alok na nakakaabot sa gabos na mga kahagadan asin teknikal na espesipikasyon kan ahensya.
Sa rason na ini, nangapudan an DSWD sa publiko na dae pagsalaon an presyong nakasurat na ABC sa procurement documents na iyo an totoong presyo kan food pack.
Nagpaluwas nin linaw an ahensya makalihis na maglakop sa social media an mga alegasyon na nagkakantidad nin labi sa P1,500 an kada Family Food Pack
