Pigbatikos kan mga senador an Department of Trade and Industry (DTI) makalihis maaraman na dae pa liwat ni-revoke an Philippine Contractors Accreditation Board (PCAB) an lisensya kan Wawao Builders asin Syms Construction Trading, mga kumpanyang imbwelto sa flood control anomalies.
Sa pagdangog kan 2026 national budget kan DTI sa Senate Subcommittee on Finance, pigbuyagyag ni Senator Imee Marcos, chairperson kan kumite, na aktibo pa man an PCAB license kan Wawao Builders sa ibong kan saindang lifetime ban gikan sa Department of Public Works and Highways (DPWH).
Sigun ki PCAB Executive Director Sergie Retome, dae pa sinda makahiro huli ta mayo mayo pang bagong miyembro an PCAB board makalihis na magbutas an tolong dating miyembro.
Isusumiter ninda an rekomendasyon kan license revocation enkaso naitalaga na an bagong board.
Pigbatikos man ni Marcos an Construction Industry Authority of the Philippines (CIAP), na igwang supervisory function sa PCAB, ta dae kaini piggagampanan an trabaho komo regulatory body.
Mientrastanto, pigsuhestiyon man ni Senator Sherwin Gatchalian, Chair kan Senate Committee on Finance, na ipagbawal na man an mga shareholders kan mga kumpanyang na ban, tanganing dae na sinda makabwelta sa mga government projects gamit an bagong kompanya.
Pigtukoy man ni Gatchalian an kaso kan pamilyang Discaya, na soboot nagribay sana nin pangaran kan kumpanya alagad mga kaparientes pa man an may-sadiri.
Simbag ni Retome, kabali ini sa mga rekomendasyong isusunad ninda sa bagong PCAB board.
