Emergency Response Vehicles, inilunsad kan Philippine Ports Authority (PPA) sa mga major ports sa nasyon

Magpapalakop an Philippine Ports Authority (PPA) nin 19 emergency response vehicles o ERVs sa manlaen-laen na pantalan sa bilog na nasyon ngunyan na semana.

Segun ki PPA Spox Eunice Samonte, katuyuhan kaini na mapakusog an kakayahan kan mga pantalan na magresponde sa mga insidente arog kan kalayo asin iba pang emergency, asin maprotektaran an mga empleyado, pasahero asin iba pang naggagamit kan pantalan.

Kabali sa kagamitan kan lambang ERV an water at foam tanks, fire pump, first aid kit, communication equipment, rescue tools asin personal protective equipment o PPE.

Ipamamahagi an mga lunadan sa mga major ports sa nasyon kabali an mga pantalan sa Batangas, Mindoro, Metro Manila, Davao, Zamboanga, Iloilo, Bohol, Bataan asin Currimao.