Binusisi kan sarong litigation lawyer an sa posibilidad na ipapod si Bise Presidente Sara Duterte komo testigo sa impeachment trial.
Sa entrevista kan Bombo Radyo Naga ki Atty. Howard Calleja – Law Professor asin Litigation Lawyer, sinabi kaini na igwa nin deretso an piskalya na ipaapod si Duterte bilang testigo, alagad dai siya pwedeng piriton na simbagon an mga kahapotan na pwedeng magresulta sa self-incrimination.
Nag-insistir man siya na magkaiba an impeachment asin criminal proceedings, kaya pwedeng magkasuhay an mga ini. An bise presidente mayo man nin presidential immunity.
Mientrastanto, nangapudan an abogado na an anuman na paninimbagan kan mga opisyal na imbwelto sa mga kontrobersiya dapat basado sa ebidensya, bako sa espekulasyon o personalidad.
Hinagad kaini sa publiko na padagos na bantayan an impeachment proceedings, orog na an mga maabot na testimonya na may relasyon sa soboot bilyones na dae maipaliwanag na yaman.
