NAGA CITY- Inarestar kan mga kabuhan kan Criminal Investigation and Detection Group (CIDG) an dating board member kan Camarines Sur sa laog nin sarong mall sa ciudad nin Naga.
Sigon ki PC/Insp. Ronnie Fabia, pamayo kan CIDG-Camarines Sur, sinaysay kaini na pigserbe ninda an warrant of arrest laban ki dating Camarines Sur Board Member Carlo Batalla makalihis an pig-atendiran kaining aktibidad sa nasambitang mall sa barangay Triangulo.
Kan Setyembre 30, 2016 pa suboot naipaluwas an nasambitang kasuguan alagad ngonyan sana ini naiserbe sa dating opisyal huli ta ngonyan sana ini nahiling kan mga otoridad.
Nahahapang suboot sa kasong libel si Batalla na igwa nin pigrerekomendar na pyansang maabot sa P10,000 para sa saiyang paramientras na libertad.
