Nag-atendir si dating Negros Oriental Rep. Arnolfo ‘Arnie’ Teves Jr. sa nakatalaan kaining arraignment na isinagibo kan nakalihis na aldaw, pasado alas-otso nin pagkaaga.
Kun saen personal o pisikal na inatubang kan dating kongresista an pagbasa kan sakdal katakod sa kasong may kinaraman sa paggadan o murder.
Ini makalihis kan obligaron kan Manila Regional Trial Branch 15 an dating lehislador na mag atendir asin ipresentar kaini an saiyang sadiri nin aktwal sa korte.
Kaya magpuon kan saiyang pagkakarsel sa laog kan Annex 2 kan Bureau of Jail Management and Penology o BJMP sa Camp Bagong Diwa, Bicutan, Taguig City, inihatod ini pasiring sa Manila City Hall.
Mantang sulot man kaini an bullet proof vest asin man kevlar helmet tangani magtao nin proteksyon sa saiyang buhay.
Bagaman an Manila RTC Branch 15 an may kapot sa nasambitan ng kaso, sa Branch 16 ini isinagibo huli ta isinasairarom pa sa pagsasaayos an pasilidad kaini asin tangani magtao nin mas maayos nin paggaganapan nin arraignment.
Sa isinagibong pagbasa kan sakdal, liwat na pighurot kan dating kongresista an saiyang karapatan asin nagsayumang maglaog nin plea. Huli digde, mismong an nasambitan ng korte na an naglaog nin ‘not guilty plea’ para sa dating kongresista.
Sa ibong kaini, kinakaatubang pa man ni ex-Negros Oriental Rep. Teves Jr. an mga patung-patong na kaso na may kinaraman man sa paggadan, illegal possesion of explosives asin iba pa.
