Pinagsugo ni Committe on Public Service Chairperson Sen. Raffy Tulfo na ipa-subpoena an gabos nin mga financial statements kan water service provider na Prime Water asin magin kan duwa pang water provider na iyong pinakadakulang supplier kan tubig sa nagkapirang parte kan nasyon siring kan Cavite asin Bulacan.
Obheto kaini na hilingon an mga loans asin kung gurani kadakula an nagastos kan mga nasambitan ng water service providers tangani bilugon an mga proyekto sa irarom kan saindang mga joint-venture agreements kaiba an mga water districts na nakakaeksperyensya nin mga water interruption.
Sigun kaya sa Prime Water, labi sa P22 billion sana an kabilogang loans na ginamit tangani pondohan an mga nasambitan ng joint ventures sa mga water districts na ini.
Sigun ki Tulfo, posibleng itinatago sana kan nasambitan ng Prime Water an totoong kantidad kan mga loans sa manlaen-laeng ahensya asin kun dae soboot tumalima sa kasuguan kan komite an Prime Water posibleng ipakulong an direktor kaini.
Kasunod kaini kinwestiyon man ni Tulfo an Department of Heath (DOH) makalihis na pabayaan an Prime Water na magsagibo nin sadiri nindang inspeksyon asin man quality testing na dapat soboot trabaho kan nasambitan ng ahensya.
Dae na dapat pang suguon asin maghalat nin direktiba gikan sa mga water district an DOH tangani magkasa kan sadiri nindang imbestigasyon orog na kun posible ining makaapektar sa salud kan mga Pinoy.
Ini an rason kaya tulos na pigsugo ni Tulfo na halian nin accreditation an DOH accredited laboratory na nagsagibo nin examination sa tubig kan Prime Water asin pinaluwas na pumasa sa quality testing.
Mientrasatnto, nilalaoman na sa masunod na pagdangog, masunod asin makakapagtao nin kabilogang financial statements an Prime Water asin an duwang iba pa mantang nagsasairarom man sa konsultasyon an gabos nin rekomendasyon sa nagin pagdangog na ini.
