Ibinaba ng Fitch Ratings ang credit outlook ng Pilipinas mula “stable” patungong “negative” dahil sa mga panganib mula sa global energy shock at pagkaantala sa public investment na maaaring makaapekto sa post-pandemic recovery ng bansa.
Ayon sa Fitch, nananatili sa “BBB” o investment grade ang Long-Term Foreign-Currency Issuer Default Rating ng Pilipinas, ngunit nagbabala ito sa lumalalang hamon tulad ng mataas na presyo ng enerhiya, tumataas na utang ng gobyerno, at paghina ng external finances.
Sa ulat nito, binigyang-diin ng ahensya ang “rising risks to the Philippines’ strong medium-term growth prospects from recent disruptions to public investment, exacerbated in the near-term by elevated exposure to the ongoing global energy shock.”
Tinatayang aabot sa 4.6% ang GDP growth ng bansa sa 2026, ayon sa Fitch, kung saan inaasahan ang unti-unting pagbangon ng public investment ngunit maaaring maapektuhan ang konsumo dahil sa mataas na presyo ng enerhiya.
Sa kabila nito, sinabi ng Bangko Sentral ng Pilipinas (BSP) na nananatiling matatag ang ekonomiya dahil sa malakas na paglago at maayos na lagay ng banking system.
Ayon kay BSP Governor Eli Remolona Jr., patuloy na mino-monitor ng bangko sentral ang epekto ng presyo ng langis at geopolitical tensions, at handang kumilos laban sa inflation sa “measured, timely, and data-driven manner.”
Binanggit din ng Fitch ang mga hakbang ng pamahalaan tulad ng National Energy Emergency at sinabing sapat pa rin ang foreign exchange reserves na nasa $106.6 billion.
Nilinaw ng ahensya na ang “negative outlook” ay hindi awtomatikong downgrade, kundi indikasyon ng mas mataas na panganib sa susunod na isa hanggang dalawang taon.
