Matrayumpong naikundusir an fluvial procession kasuudma Setyembre 19, 2026 sa cuidad nin Naga.
Sa intrevista kan Bombo Radyo Naga ki Mayor Jerold B. Peña, Presidente kan Our Lady or Peñafrancia, sinabi kaini na mag-aalas siyete nin pagkabanggi kan mailuwas si Inang peñafrancia sa Naga Metropolitan Cathedral makalihis ikundusir an Banal na Misa mantang nainot ng nailuwas an El Divino Rostro.
Alas 8:45 nin banggi kan makaabot si Ina sa danlugan na manunutaran sa may tulay kan Barangay Tabuco.
Magigirumduman na kasubangui, nagpaluwas nin abiso an Naga City government sa pagbago kan schedule kan pagsakay sa Pagoda ki Inang Penafrancia asin El divino Rostro huli sa low tide.
An dating alas sais na pagpoon kan sakay nag-adjust ini nin haros tolong oras huli ta kaipuhan na halaton an high tide antes isakay an patron sa Pagoda pasiring sa Basilica Minore.
Ini na an pinakaprimerong beses na nagbago an oras kan sakay sa historya kan Fluvial Procession sa Syudad nin Naga. Sa ibong kan pagbabagong ini, matyagang naghalat asin nag-antabay an mga deboto hasta sa naihatud an patron sa Basilica asin ikundusir an Banal na Misa.
Mientrastanto, nagpakol man sa 1.2 million an mga nakisumaro sa aktibidad base yan sa datus kan Emergency Operations Center- Incident Management Team (EOC-IMT).
Segun pa sa alkalde, saro ining patunay na anuman an mga angat sa buhay kan tawo, yaun man giraray an pagtitiwala ki Ina asin daing patud na naghalat an mga deboto antes na matapos an saro sa pinakadakulang selebrasyon kan bilog an rehiyon.
Dagdag pa kan opisyal na nagpaluwas ini nin kasuguan kan extension sa pagbyahe kan nagkapirang kumpanya nin bus na byaheng Partido- Naga tanganing makasakay papuli an mga debotong nagdayo pa sa syudad nin Naga.
