NAGA CITY– Sa karsel an bagsak kan sarong empleyado kan lokal na gobyerno kan Bula, Camarines Sur makalihis makuanan nin bulto-bultong pigtutubudang shabu kan Philippine Drug
Enforcement Agency (PDEA). Binisto an suspek na si Sylvia Valera, 55-anyos. Sa entrevista kan Bombo Radyo Naga ki Agent Vidal Bacolod kan PDEA-CamSur, sinaysay kaini na ipinasairarom ninda sa sarong operasyon si Valera sa hampangan mismo kan San Agustin Elementary School sa Barangay San Agustin sa banwaan kan Canaman sa parehong probinsya.
Sigon ki Bacolod, duman soboot nakipaghilingan an suspek sa supplier kaini alagad dae na ninda naabutan an nasambitan ng source kung kaya si Valera sana an nadakop.
Narekober sa suspek an apat na bulto kan pigtutubudang shabu na nagkakantidad nin labi sa P150,000. Napag-araman na enot nang nadakop an aki ni Valera na nakakulong na ngunian huli sa parehong iligal na gibo.
Sa ngunian, nagpapadagos pa an imbestigasyon kan PDEA para masusog an supplier ni Valera asin an iba pang mga posibleng kaibanan kaini.
