An grupo kan depensa ni dating Presidente Rodrigo Duterte naghagad sa International Criminal Court (ICC) na bawasan an kadaklan kan mga ebidensyang isinumite kan prosekusyon, na sinabi nindang posibleng makaapektar sa saindang pagpreparar para sa paglilitis.
Sa sarong filing na isinumite kan Setyembre 25, sinabi kan lead defense counsel na si Peter Haynes na naglangkaw nin 978 porsiyento an ebidensya kan prosekusyon, hale sa 5,275 na items pasiring sa 62,130 na files na katumbas nin labi sa 320,000 na pahina. Segun sa depensa, mangangaipo nin tinatayang 16,000 oras tanganing surion an mga dokumentong ini bago an nakatalaan na trial sa Nobyembre 30.
Kinuwestiyon man kan depensa an kalidad asin relevance kan nagkapirang files, kaiba an sinasabing salang metadata, duplicate documents, dai mabasa na scans, suway-suway na pahina asin mga dokumentong daing direktang koneksyon sa 49 na insidenteng sakop kan kaso.
Partikular na tinukoy kan depensa an sarong dataset na igwang 44,400 na items na naglalaog nin impormasyon manungod sa labi sa 20,000 na kagadanan na konektado sa droga.
Inakusaran man kaini an Office of the Prosecutor nin paggamit nin automated AI-generated summaries sa pagproseso kan nagkapirang files, sarong pahayag na parte kan argumento kan depensa sa saindang mosyon.
Tanganing malikayan an pagkaantala kan trial, iminungkahi kan depensa na maghimo an prosekusyon nin bagong case file na dai malampas sa 10,000 na properly reviewed items, kaiba an relevant, verified asin non-duplicative na ebidensya asin mga materyal na posibleng pabor ki Duterte.
Inaasahan na magdedesisyon an Trial Chamber III sa mosyon sa mga masunod na aldaw.
