NAGA CITY– Kinondena ngunian kan grupo kan paraoma sa bilog na probinsya nin Camarines Sur an mga programa ni Presidente Rodrigo Duterte na suboot anti-magsasaka asin anti- mamamayan.
Katakod ini kan suboot pagpapatindog kan gobyerno nin international airport sa haros 200 hektaryang pagsasadiri kan mga paraoma sa banwaan nin Pili, sa nasambitan ng probinsya.
Sa entrevista kan Bombo Radyo Naga ki Nelsy Rodriguez kan Bagong Alyansang Makabayan, sinaysay kaini na haros labi 1,000 paraoma na gikan pa sa manlaenlaeng parte kan probinsya an kaibahan sa nasambitan ng mahiwasang hiro-protesta.
Sigon ki Rodriguez, obheto kan protesta na maipaabot sa administrasyon ni Presidente Duterte an mga kahagadan kan mga paraoma komo pagkontra sa nasambitang programa huli ta dakulang kawaran suboot sa sainda an nasambitan ng proyekto.
Kun marurumduman apwera sa proyektong expansion kan runway kan Naga City Airport sa banwaan kan Pili, enot na man nagpahayag kan saindang pagkontra an mga paraoma sa propwestong domestic airport sa banwaan kan San Jose sa parehong probinsya.
An nasambitang problema sa aropwerto sa banwaan kan Pili an enot nang inisplikar kan mga namamayo na may allocation funds tanganing bakalon sa mga praoma an saindang daga alagad mahigot na kinontra kan mga ini huli sa hababa suboot na kantidad.
Mantang an domestic airport man sa San Jose, an enot nang pinaboran ni 4th District Representative Noli Fuentebella huli ta dakula suboot an maitatabang kan nasambitang aeropwerto sa pagpapauswag kan turismo sa saindang lugar.
Apwera digdi, enot na mang nag pabor si Department of Energy (DOE) Sec. Alfonso Cusi sa nasambitang proyekto huli ta saro suboot sa mga prayoridad kan Duterte Administration na makapagtao nin hanapbuhay asin mapa-uswag an sarong lugar.
