Nag-abot na sa P3.39 bilyon an danyos asin pagkalugi sa sektor nin agrikultura huli kan Habagat asin tolong tropical cyclones na Luis, Maymay asin Neneng, segun sa Department of Agriculture (DA).
Base sa pinakahuring assessment kan DA, 80,500 na paraoma asin parasira an apektado, mantang 72,766 ektarya nin agricultural areas an naraot.
Pigkakarkulong 82,631 metriko tonelada nin mga produktong agrikultural an nawara huli sa mga disturbo kan panahon.
An paroy an pinaka naapektaran, na nagtala nin P1.86 bilyon na danyos. An danyos sa high-value crops uminabot sa P867.69 milyones, mantang an perwisyo sa fisheries asin aquatic resources uminabot sa P412.84 milyones.
An mga lugar na may nairehistrong danyos iyo an Cordillera Administrative Region, Ilocos Region, Cagayan Valley, Central Luzon, CALABARZON, MIMAROPA, Bicol Region asin Western Visayas.
Segun sa DA, nagpapadagos pa an assessment asin validation sa mga apektadong lugar kun kaya posibleng maglangkaw pa an danyos.
Mientrastanto, nagpreparar na an ahensya nin kantidad P609.79 million na agricultural inputs, kabale na an mga bAnhi asin planting materials, para sa mga paraoma na apektado kan Kalamidad.
