Piglangkaw pa kan Philippine Rice Information System(PRiSM) an hewas kan mga omahan na pigkakarkulong maaapektaran sa mga pag uran na dara kan nabuo na TD Querobin sa Mindanao.
Susog sa satellite-based rice monitoring system kan nasyon, posibleng maabot sa 19,119 ektarya nin mga omahan an maapektaran, mas halangkaw kumparar sa inisyal na haros duwang ribong ektarya kan nakalihis na aldaw nin Martes.
Ini pigbibilog kan 925 ektarya nin mga omahan na presenteng nasa vegetative phase asin 5,442 ektarya na presente man yaon sa ripening stage.
Dakulang porsyento kaini an nasa reproductive phase.
Ini an katampad kan 12,752 ektarya nin mga kaparuyan.
Kadakle digde an gikan pa sa mga probinsya sa Mindanao, mantang posible man na maapektaran an mga omahan sa mga probinsya sa Bicol Region huli sa magagabat na pag-uran.
Basado pa sa pagtaya kan state weather bureau, sa masunod na 24 oras, halangkaw an tyansa nin makukusog na pag-uran sa kabilogan nin Bicol Region, Eastern Visayas, asin mga probinsya kan Agusan del Norte asin Agusan del Sur, Davao de Oro, Davao del Sur, asin Davao del Norte, huli sa pinagsabay na epekto kan tropical depression asin Shear Line.
