NAGA CITY – Pigkumpirmar na kan PAGCOR na si Harry Roque an nagin legal head kan pig-raid na Philippine Offshore Gaming Operators (POGO) sa Porac, Pampanga.
Sa pagdangog kan Senate Committee on Women and Children, sinaysay ni Pagcor Chairman Alejandro Tengco an pangaran ni dating Presidential Spokesperson Harry Roque na nag-lobby para sa POGO hub na Lucky South 99 sa Porac, Pampanga na ni-raid kan mga otoridad. Pigsalaysay kan opisyal na kan ikatolong semana kan Hulyo 2023, nakaresiber an na saindang opisina nin apod gikan ki Roque na naghahagad ini nin appointment sa saiya.
Kan Hulyo 26, 2023 man, nagpasiring soboot si Roque sa saiyang opisina kaibanan si Katherine Cassandra Ong, na authorize representative kan Lucky South 99. Soboot, kaibanan kaining nakipag-usay kina Atty Roque si Atty. Jessa Fernandez asin an namamayo kan Gaming and Licensing Division kan Pagcor. Nakiulay soboot si Roque na tabangan si Ong nin huli ta igwa sinda utang an saindang kompanya na 500,000 US Dolar nin huli soboot sa panloloko ni Dennis Cunanan sa sainda kun saen dae pigbayadan sa PAGCOR na para kuta sa gaming fees asin ibang additional fees.
Si Cunanan soboot an nag-facilitate kan mga dokumento kan licensees na Lucky South 99 asin si Cunanan man soboot an opisyal na kinatawan kan nasambitan ng POGO hub na nakarehistro sa Pagcor kaya siring na sana an tiwala kaini ki Cunanan.
Mientrastanto, sinaysay pa ni fernandez, na kaiba ni tengco sa pagtitiripon, anom na beses ining nakipagkoordinar ki Roque tanganing sunudan an application kan lisensya kan lucky south 99. Alagad parehong piglinaw ninda Tengco asin Fernandez na dae sinda pigpirit ni Roque na itao an lisensya sa nasambitan ng POGO firm.
Sigun pa ki Tengco, pinangaranan si Roque komo head kan legal department kan Lucky South 99 basado sa organizational chart kan POGO firm na pigsumiter para sa saindang liwat na pag-apply nin lisensya.
Sigun man ki Fernandez, pigsayumahan an application kan lisensya kan lucky south 99 nin huli ta nakahiling sinda nin mga dahilan tanganing dae sinda pagtugotan.
Marurumdoman, kan Hunyo, pigbuyagyag ni Tengco, alagad dae kaini pigpangaranan na igwa nin sarong dating cabinet official an nag-lobby para sa pagtatao nin lisensya sa pirang ilegal na POGO.
