Nag-abot sa sarong bagong rurok kan karera kan Hollywood actress na si Zoe Saldaña makalihis an trayumpo sa takilya kan pelikulang “Avatar: Fire and Ash” (2025), na nagluklok sa saiya komo highest-grossing actor of all time.
Nalampasan kan 47-anyos na Amerikanang aktres si Scarlet Johansson makalihis na makakua nin labi US$1.2 billion sa bilog na kinaban an ika-tolong installment kan Avatar franchise.
Huli digde, nag-abot na sa labi US$16.8 billion an kabilogang box office earnings kan mga pelikulang kinababalihan ni Saldaña, sigun sa film industry tracking site na The Numbers.
Nasa ikaduwang pwesto man si Johansson na igwang US$16.4 billion.
Ginampanan ni Saldaña an karakter na si Neytiri sa tolong pelikula kan Avatar, katuwang si Sam Worthington komo Jake Sully gikan sa orihinal na pelikula kan taong-2009, sinundan kan “Avatar: The Way of Water” (2022), hasta sa pinakabagong sequel.
Apwera digde, bistado man ini sa papel komo Gamora sa “Guardians of the Galaxy” trilogy kan Marvel asin sa nagkapirang pelikula kan Avengers na orog na nagpatibay sa saiyang dominasyon sa box office.
Nagganap man ini komo Nyota Uhura sa rebooted Star Trek trilogy, na iribahang nakakua nin kita na labi US$1 billion sa bilog na kinaban.
Si Saldaña an primerong aktres na nagluwas nin apat na pelikulang nakakua nin labi US$2 billion kada saro sa takilya.
