Pig-inkaminar kan International Criminal Court (ICC) an gabos na mga nasyon asin an saindang mga korte na suportahan an pagpapautob asin pagpapairal kan international law sa bilog na kinaban.
Ginibo ni ICC President Judge Tomoko Akane an apelar kasabay kan pagselebrar kan ika-28 anibersaryo kan pagkakabuo kan Rome Statute, na bunga kan pagtatarabangan kan mga nasyon sa bilog na kinaban.
Segun ki Judge Akane, an ICC sana an permanenteng korte na may kapangyarihan na tapuson an impunity o kawaran nin pananagutan, asin usigon an mga makapangyarihang lider na nakagibo nin mga karumal-dumal na krimen.
Poon kan maitatag an International Tribunal, nagibo na kan korte an saiyang mandato asin padagos pa kaining gigibuhon an saiyang misyon.
Naninindugan an tribunal na dai magiging epektibo an pagpapaitob kan International Law kun mayo nin independiyenteng Judicial Institution arog kan ICC na mayong takot na magpautob kan ley para sa pag-iral kan hustisya.
Segun pa ki Judge Akane, an padagos na pag-iral kan ICC sarong mahalagang pananggalang tanganing masigurong dai makakaligtas an mga lider kan mga nasyon o makapangyarihang mga indibidwal sa saindang pananagutan kun makagibo sinda nin mga krimen arog kan Crimes Against Humanity.
Dahil digdi, importante aniya na mamantiner an independensiya kan Tribunal asin magin suway ini sa ano mang impluwensiyang pulitikal.
An Tribunal, segun pa saiya, nagsisirbing tanglaw nin paglaom sa mga biktima nin krimen sa manlain lain na parte kan kinaban.
Magigirumduman na bago kaini, nagpahayag si US President Donald Trump nin saiyang kagustuhan na mabuwag na an ICC asin pig-inkaminar an mga nasyon na tumiwalag sa naturang Tribunal.
Segun pa ki Judge Akane, dai lingid sa kaaraman kan ICC an mga pag-atake laban sa korte sa naglihis na mga aldaw.
Aram aniya kan korte an pressure na hinahapot ninda, hale sa mga pag-atake asin an soboot na nagbababang commitment kan nagkapirang nasyon na suportahan asin ipautob an International Law.
Maski dakulang hamon ini, sinabi ni ICC President Judge Tomoko Akane na matiner na matatag an ICC sa pag-atubang asin pagresolbar kan nasabing problema.
