Kinumpirmar kan International Criminal Court (ICC) Pre-Trial Chamber 1 na nakaresiber ini nin simbag gikan sa Kingdom of the Netherlands katakod sa kasuguan kaini sa Dutch government na magtao nin obserbasyon dapit sa kahagadan na interim release ni dating Presidente Rodrigo Duterte.
Basado sa redacted filing na may petsang Setyembre 26, sinaysay kan ICC na nakaresiber ini nin komunikasyon gikan sa Dutch government kan nakalihis na Hulyo 2, alagad dae na idinetalye pa an simbag na naresiber kaini.
Nakabugtak man sa dokumento kan ICC na kan nakalihis na Hunyo 20, ipinadara kan Registry an kasuguan kan Pre-Trial Chamber na nag-i-imbitar sa host state na magsumiter nin obserbasyon kaini katakod sa isyu nin interim release kan dating Presidente kan Pilipinas.
Mientrastanto, sa lado man kan Office of the Prosecutor, tinutulan kaini request kan depensa para sa interim release asin pighurot na an padagos na pagtitinir ni Duterte sa detention facility sa The Hague, pigsierto na mahampang ini sa saiyang trial kasabay kaini an pagpugol sa dating Presidente na manghimasok o i-kompormiso an imbestigasyon asin man mga paglilitis sa korte.
