Tutukaron sa Marso 25 Committee Hearing an Impeachment Complaint laban ki Bise Presidente Sara Duterte.
Sa entrevista kan Bombo Radyo Naga ki Atty. Benjamin Guillermo B. Magadia (Law Professor, Author, Private Practitioner), sinabi ni Magadia na an impeachment sarong political question siring sa nakasurat sa Konstitusyon asin bakong simpleng caso civil o criminal.
Saiyang ipinaliwanag na sa proseso, enot na hinihiling kan Committee on Justice an porma asin sustansya kan reklamo. Kun tama an dokumento asin igwa nin supisyenteng laog, pwede ining ipadagos sa plenaryo. Paliwanag kaini, kun sala an porma, automatic na mabasura an kaso. Dugang pa kaini na sa substance, mahihiling kun may substance o speculation sana.
Sinambit man kan abogado na nakasentro an reklamo sa paggamit nin confidential funds asin alegasyon nin pagtraydor sa tiwala kan publiko asin culpable violation kan Konstitusyon. Alagad, pigduon kaini na masakit magtao nin konklusyon sagcod na dai nahihiling an mga dokumento.
Pinag-olayan man an posibilidad na i-boycott kan kampo ni VP Duterte an Marso 25 hearing huli sa soboot kawaran nin deretso na mag-cross-examine. Piglinaw ni Magadia na mayo pa nin trial sa ngonian na yugto, kaya dae pa sakop an cross-examination. Dugang pa ni Magadia, presumption of innocence sana ini. Dai kaipuhan na piriton an akusado na magsimbag.
Kun mag-abante an reclamo, kaipuhan an un-tersio kan voto kan Kongreso bago ini maipadara sa Senado. Duman, susubukan kun yaon pa an pig-aapod na Duterte power. Pagirumduman ni Magadia na kun magdemitir si VP Duterte, magigin daing saysay an impeachment, apwera na sana kun mawot kan mga reclamador an sarong hatol na maresulta sa lifetime disqualification sa pagdalagan sa arin man na pwesto.
Nangapudansi Atty. Magadia na an bagay na ini dai pag-ibahan sa emosyon, kundi base sa ebidensya: Dapat makusog an ebidensya laban sa akusado.
