NAGA CITY- Pigreport kan Philippine Statistics Authority Bicol na an inflation rate sa Rehiyon an nagluya gikan sa 2.2 percent kan May pasiring sa 1.5 percent kan June.
Sigun ki PSA-5 chief statistician specialist Rey Merjilla, an average na inflation kan Rehiyon puon Enero hasta Hunyo 2025 an nag-abot sa 2.2 percent.
An pagbaba kan kabilugang inflation kan June 2025 an huli sa pagbaba man kan presyuhan nin pagkakan asin non alcoholic beverages partikularmente sa gulay, tubers, cereals, sira asin seafood.
Dugang pa ni Merjilla na an housing, tubig, kuryente asin iba pang produktong petrolyo an nakapagkontribwer sa pangkabilugang inflation sa Rehiyon.
Apwera digde, an personal care asin miscellaneous an nakatabang man sa pangkabilugang inflation sa Bikol.
Pigsaysay pa kan opisyal na an limang nangengenot na contributors sa June inflation iyo an karneng orig, restaurants, cafes, rentals, karneng manor asin sira na gikan sa preskong tubig o fresh water fish.
Sa data man na pigpaluwas kan PSA para sa anom na probinsiya kan Bicol Region nagpapahiling na an Albay an igwang 1.6 percent; Camarines Sur na 1.2 percent; Sorsogon na igwang 1.8 percent; Catanduanes na igwang 3.1 percent; Masbate na 1.5 percent asin Camarines Norte na 0.5 percent.
An Inflation an taunang pagbabago kan rate kan consumer price index na pigpapahiling sa paagi kan percentage asin ini an pig-interpretar sa paagi kan pagbaba sa purchasing power kan kwarta.
