(UPDATE) NAGA CITY- Nagpapadagos pa suboot hasta ngonyan an pigkokondusir na inventory kan mga kabuhan kan Philippine Drug Enforcement Agency (PDEA) asin kan Philippine National Police (PNP) sa nadiskobreng shabu laboratory sa banwaan nin Ibaan, Batangas subagong aga.
Sa impormasyong ipinaabot kan PNP Ibaan sa Bombo Radyo Naga, nagpapadagos pa ngonyan an saindang pigkokondusir na inventory sa nasambitang shabu laboratory na nadiskobre sa Hingoso Farms sa barangay Sto. Niño sa nasambitang banwaan.
Binisto man kan mga otoridad an naarestar na apat na mga Pilipino na sinda Eduardo Lorenzo, Rosaleo Cesar, Amancia Gallarde asin Sanny Baguio.
Apwera sa mga Pilipinong naarestar sa compound kan nasambitang lugar, nadakop man kan mga otoridad an duwa suboot na Chinese chemist na binisto na sinda Guo Zixin asin Tian Baoquan.
Mientrastanto, sa suway man na operasyon na pigkondusir kan mga kabuhan kan PDEA, naarestar man an saro pang Chinese chemist na si Hong Dy asin an driver na si Nestor Baguio.
Napag-araman na tolong semana na suboot na nag-o-operar an laboratoryo asin kaya kaining makagibo nin 25 kilo nin shabu sa sarong aldaw apwera pa sa ecstacy na pwede man na gibuhon duman.
